Moumen Khairy July 10, 2020

إسمع كلامي ...
المطعم ده أي كلام ...
يا راجل ؟؟؟
آه والله دانا ف مرّة روحتو ولقيت في الساندويتش بتاعي حتة لحمة مش مستوية كويس
ياه ... بجد ؟؟؟
آه تخيل !!!
لا ياعم وعلى إيه ... خلاص مش رايح أنا ...
...
الحوار اللي فات ده كام مرة إتقال لك ؟؟؟
وكام مرة قولتو ؟؟؟
والسؤال دلوقتي
هل كل مرة فعلاً كان المطعم كدة ؟؟؟
وهل إنت لو كنت دخلت بعد ما قررت تجرب بنفسك
لقيت كده ؟؟؟
الإجابة ببساطة قوي
لأ !!!
أومال إيه اللي حصل ؟؟؟
الشخص اللي دخل المطعم قبلك ـ ماشافش كل الحاجات الحلوة اللي فيه وشاف سوء حتة معينة في السندويتش ـ أو بمعنى أصح – كان شايف كل حاجة حلوة حواليه ، من إضاءة وموسيقى هادية وإستقبال رائع وأدوات الأكل نضيفه ، ومجرد ماشاف عيب السندويتش نسي كل الحاجات الحلوة اللي شافها من ساعة ما دخل المطعم ـ وركّز بس على السندويتش ، لأ وقرر كمان إنو مش هايدخل المطعم ده تاني لإنو أكيد هايلاقي نفس المشكلة كل ما يدخل !!!
بالمناسبة ...
هو دخل قبل كدة كتير وكان الأكل رائع لكن مجرد ما شاف حاجة وحشة – قرر مايدخلش تاني
وكمان بدأ يأثر عليك وينصحك عشان ماتدخلش إنت كمان للمطعم ده ...
عارفين يا جماعة إيه اللي حصل ؟؟؟
من عجائب العقل البشري إنه بيلجأ لـ3 عمليات في الحكم على التجربة اللي بيتعرض لها :
1- التعميم 2- الإلغاء 3- التخيّل
1- التعميم :
وهو إن العقل بياخد جانب معين من التجربة ، ويقوم بتعميمه بشكل يؤدي إلى إن الجانب ده يصبح هو كل التجربة !!!
وده الأمر اللي بيؤدي ف نفس الوقت إلى ...
2- الإلغاء :
وهو إن العقل ف نفس الوقت اللي عمم فيه جانب معين من التجربة ، لغى جوانب تانية كتير في نفس التجربة ، يعني الشخص اللي ماعجبوش السندوتش عمم حالة الإستياء اللي هو فيها على التجربة كلها ولغى معاها كل الجوانب التانية اللي كانت بالفعل إيجابية من نضافة وإضاءة وحسن إستقبال و ............إلخ
ومن هنا هايبدأ العقل يشتغل في العملية التالتة وهي ...
3- التخيّل :
وهي إن العقل هايبدأ من دلوقتي يتخيل إنه كل مرة يدخل المطعم ده (اللي هو التجربة) هايلاقي السندوتش فيه عيب (الجانب السلبي اللي هو قام بتعميمه) ف من دلوقتي قرر إنو مايدخلش المطعم ده تاني !!!
...
قد إيه عشت ف حياتك تجارب – ودخلت فيها – وكان فيها جانب سلبي والجانب ده شوّه معالم التجربة كلها بكل الحاجات الحلوة اللي فيها ؟؟؟
وقد إيه بناءً على تعميمك ده قررت ماتخوضش التجربة دي تاني مهما كانت الظروف ؟؟؟
أحب أطمنّك لحاجة مهمة ، مفيش تجربة كلها إيجابية أو كلها سلبية ، ولكن عقلك هو اللي بإمكانه النظر لأي جانب منهم ...
بإذن شخصي منك !!!
طب والحل إيه ؟؟؟
شوف عقلك بيركز على إيه في التجربة ، وشوف هي سلبية ولا إيجابية
لإن مجرد ما هاتركّز على واحدة فيهم هايحصل بشكل فوري الـ3 عمليات ...

تعميم ثم إلغاء ثم تخيل !!!
ف خد بالك كويس إنت بتركز على إيه ...
وخد بالك ...
في شغلك ...
ماتعممش الحاجة السلبية اللي فيه وتلغي كل الإيجابيات ...
مش هاتستمتع في شغلك
في حياتك مع أصحابك ...
ماتعممش صفة مش بتحبها ف حد من أصحابك ...
هاتخسر أصحاب كويسين كتير
في حياتك الخاصة مع حبيبك ...
ماتعممش تصرف لحظي حصل في موقف معين ...
صدقني ممكن تخسر حد بيحبك قوي
في علاقتك بربنا ...
ماتعممش خطأ إرتكبته في حق ربنا ...
وتقول إني أنا على طول كدة ...
ده هايلغي حاجات حلوة كتير بتعملها مع ربنا ...
ممكن قوي تخسر الجنة !!!
خلّي بالك من عقلك ...
لإنه مش بيختار إتجاه تفكيره ...
إلا بتوجيهات رسمية من سعادتك

Share your own article to be the next published one: 747CG Article