Moumen Khairy Dec 18, 2020

محدش حاسس بيا حاسس إن آنا مخنوق و مش عاوز آعيش يمكن دي تكون آكتر جملة بيكررها شخص بيعاني آو بيمر بحالة إكتئاب و ساعتها الأغلبية بتشوفه إن هو شخص “seeking attention” بيدور على الاهتمام آو إنه بيلعب دور الضحية و مستمتع بيه ده ممكن يكون الوش الجريء شوية للإكتئاب عن طريق محاولات بائسة منه للخروج من حالة الضعف و اليأس و العجز اللي بيمر بيها ، آما بالنسبة للوش الجبان فهو الوش اللي دايما مستخبي ورا ستارة “آنا كويس” ، “مفيش حاجة” ، “انا تمام انت عامل ايه” الوش اللي دايما بيقنعك ان الدنيا وردي او هتبقى و ساعتها بدل ما هتدرك إنك مكتئب و محتاج تتحرك هترجع خطوتين لورا و تبدأ تختفي و تتحجج بحجج فارغة لكل اللي حواليك زي “أنا تعبان شوية،مشغول،و غيره و غيره” فتفضل كاتم على قلبك زي حلة الكباب حلة ☺️ بس مفيش منفس بخار لحد ما تنفجر في كل اللي حواليها دون آي إنذار مسبق آو آنبوبة البوتاجاز تخلص فمتنفجرش لكن رحلتها بتنتهي بشكل دموي خلاصا من العذاب اللي بتمر بيه . الاكتئاب مرض ملوش موسم بيدق الباب في آي وقت و واحد من آشرس الآمراض النفسية على مستوى العالم ، حيب آخر إحصائية لمنظمة الصحة العالمية حوالي ٣٠٠ مليون شخص بيعانوا من الإكتئاب في العالم كله من مختلف الأعمار و حوالي ٨٠٠ ألف بيموتوا كل سنة نتيجة الإنتحار و ده للأسف تاني سبب رئيسي للوفيات في الفئة العمرية بين ١٥-٢٩ سنة و ده بيرجع لأسباب كتير جدا أهمها إن المكتئب مبيعبرش عن مشاعره و الأفكار اللي بتجيله لأي حد مختص و ده خوفا من وصمة المرض النفسي ،إحساسه المستمر بالذنب من آغلب اللي حواليه نتيجة ربط مفموم الإكتئاب بالبعد عن ربنا و الدين و ده بيغذي جلده لنفسه بشكل متكرر و مستمر ، الناس المحيطين بيه و على السوشيال ميديا و هي راسماه و حاطاه في قالب العيل الفرفور وإن حياته تافهة و بلا قيمة ده غير مزايدات من كل من هب و دب زي إنتو شفتو بهدلة أنتو ده إنتو متدلعين و آنا حياتي صعبة زيك و أكتر و مفتحتش بقي ولا اتكلمت . الإكتئاب ليه مسببات نفسية وبيلوجية بتسبب حدوثه و آكتر من شكل و بيختلف على حسب شدته و أنا عن نفسي بشبه الاكتئاب بالنوة بس “نوة نفسية” بسحب شغفك للحياة و حبك لأي حاجة بتمتص طاقتك لحد ما ميبقاش ليك نفس لأي حاجة صعب تحدد شدتها ولا هتخلص امتى . طيب مريض الاكتئاب محتاج مني ايه ؟؟ محتاج إن يكون في وعي عن طبيعة الاكتئاب و إن وجوده طبيعي و مش وصمة ولا عار و إن نوقف نحسس الشخص المكتئب بالذنب و إنه بعيد عن الدين و عشان كده الدنيا بايظة معاك . الاكتئاب ليه علامات زي البرد كده بتحس منها انك داخل عليه و ساعتها محتاج انك تعترف بوجوده و تبتدي تتحرك و متسيبش نفسك ليه و بلغ أقرب الناس ليك عن إحتياجك للمساعدة و تابع مع حد مختص لإن دي أول خطوة للخروج من الإكتئاب و ربنا يسلمنا جميعا و يحفظنا لكل اللي بنحبهم و بيحبونا.
#الاكتئاب
#الانتحار
#المرض_النفسي_مش_وصمة
#لايف_كوتش
#كوتش_مؤمن

Share your own article to be the next published one: 747CG Article