Moumen Khairy Jan 1, 2021

تخيّل نفسك روحت لطبيب العيون ف مرة
وقال لك مالك
وكان ردك
مش قادر أشوف كويس يا دكتور
ف قال لك
إتفضل على الكرسي اللي هناك ده
وبدأ يمارس عمله بالطريقة اللي كلنا عارفينها طبعا
الفتحة فين ؟؟؟
طب دي ...
ودي ....
طب دي ...
ويبدأ يجرب مجموعة مختلفة من العدسات في نضارة محطوطة على عينيك ، لحد ما تستقر على عدسات معينة تقدر تشوف بيها العلامات اللي مش واضحة ...


وبعد ما نستقر على عدسات بدرجة معينة
نستلم النضارة وإحنا فرحانين
أخيرا هانشوف !!!
وبعد فترة مش كبيرة
نكتشف إن العدسات ماكانتش مناسبة
ف نروح للطبيب تاني
إلحق يا دكتور
أنا مش شايف بالنضارة كويس
ده من غيرها كان أحسن
ف يكون الرد بتاع الطبيب
وأنا مالي
هو أنا اللي إخترت العدسات ؟؟؟
مش إنت اللي إخترت وقلت إنها مريحاك ؟؟؟
ف يتم الكشف من أول وجديد لعل وعسى تصيب المرة دي وناخد عدسات نقدر نشوف بيها ....

نظرتك للأمور
المثال اللي قلته قبل كدة ده هدفه حاجة واحدة ... يا ترى نظرتك للأمور عاملة إزاي ؟؟؟ وهل نظرتك للأمور صح ولا لأ ؟؟؟
خد بالك
إنت اللي بتختار الطريقة اللي بتشوف بيها
مش بتتفرض عليك من حد
زي بالظبط العدسات اللي الدكتور بيحطهالك
وتجربها
لحد ما تستقر على عدسة واحدة تشوف بيها
إنت اللي إخترتها
مش الدكتور
اللي بينظر للأمور بشكل سطحي وبإستهتار
أول حاجة بتهمو ف العدسات إنها تكون ملونة
وشكلها لذيذ
وتحفة
والناس لما تشوفو لابسها تقول الله عليه
لكن ده بعد فترة قليلة هايكتشف إنه كان غلطان
لإنو رغم الألوان الجميلة للعدسة والمدح المستمر من الناس
إلا إنو ماقدرش يشوف بشكل كويس
وده هايخليه يكتشف إنو ضيع وقت كتير في محاولة للرؤية بشكل كويس ، وهايتضح لو ف الآخر إن العيب كان ف العدسة
وكمان هايتحمل تكاليف من أول وجديد ... وهي تكاليف تغيير العدسة دي

أمابقى اللي بينظر للأمور نظرة مستقبلية وبشكل متعمق وجاد
أول حاجة تهمو ف العدسات إنها تكون مناسبة ليه
قادر يشوف بيها كويس
وعلى المدى الطويل
ممكن مايهموش شكلها عامل إزاي
الناس ماتهموش ف حاجة
إيه يعني لو إتريقو على شكلو وهو لابسها
ف سبيل إنو يكون شايف صح
؟؟؟
مش مهم يتهموه بالرجعية
أو التخلف وعدم مجاراة التيار والعوم معاه
كل ده ولا يفرق معاه ف حاجة

اللي يفرق معاه بجد
نظرته للأمور
وحسن التقدير ليها

نظرتك للأمور هي اللي بتحدد حياتك
وبتخطط مستقبلك بشكل أفضل
نظرتك للأمور
هي اللي إنت شايفو جوّاك
وحواليك
واللي فات واللي جاي

ممكن يختلف من شخص لآخر ؟؟؟
طبعا ممكن
حتى لو نفس الموقف واحد ؟؟؟
أكييييد
إزاي بس ؟؟؟

مانا قلتلك ف أول الموضوع
كل واحد إختار العدسة اللي تريحو
واحد حب يعيش علشان الناس تعجب بيه وتصقف له
وواحد حب يعيش علشان يتعلم ويستفيد ويتغير للأفضل ومش مهم كلام الناس

صحيح
يا ترى إنت لابس أنهي عدسة ؟؟؟

Share your own article to be the next published one: 747CG Article