إزاي أحفز نفسي ؟

Success Stories.

إزاي أحفز نفسي ؟


Ola Ebeid Jan 19, 2021

حاجة ظريفة اوى بقا ساعات بتحصل مع الستات
جوزها صحى الصبح صبح عليها وكله تمام
فطر ولبس وحط البرفان وسلم وبوسه من هنا ومن هنا وكله تمام
مش عاوزين حاجه وانا راجع يا حبيبتى لاياحبيبى سلامتك وكله تمام
الراجل نزل الشغل وكله تمام والدنيا بيس
الست بتظبطت الولاد للمدرسة وقابلت رحلة الكفاح معاهم إللى مضيع كتاب واللى مضيع شراب واللى مش عجبه لبس الألعاب واللى مش عاوزة تعمل ضفيرة و عاوزة شعرها زى شاكيرا وهى رايحه المدرسة واللى معترض على المصروف و عاوز مصروف رئيس مجلس إدارة
وتلاقى الست بدأت تتنرفز ووشها يحمر وصوتها على والجيران بدأو يسمعو لغاية ما البص يجي ويخلصها من الاصطباحة العسل بتاع كل يوم
وتبقى تلت طاقتها خلصت وجالها شوية زهق
وتستغفر وتنفخ نفختين على الجواز وسنينه واللى كانو بيتجوزو
وتفتكر منظر جوزها وهو بيفطر وبيحط البرفان وهو نازل ومشافش إللى هى شافته على الصبح
تبدا تلبس لشغلها وتنزل وتروح الشغل يقابلها مشكله ولا اتنين تكون عبتلها كمان شوية طاقات سلبية هدت حيلها
رجعت من شغلها يا حبيبتى ويادوب غيرت هدومها ويمكن ملحقتش
ودخلت ياعين امها على المطبخ تعمل الغدا وترصه للولاد وقال ايه الولاد مش عاجبهم الاكل انتى عامله لحمه ورز وخضار
احنا عاوزين ماك
أو كنتاكى
أو بيتزا
وتبدا تانى الام فى رحلة الكفاح معاهم وأقناعهم ان ده الصحى والمناسب ويطلعو روحها على مايكلو
وبعدها وراها مطبخ ومواعين
وبعدها مذاكرة وهوم وورك لغاية مايشرف جوزها بليل آخر اليوم وهى مش فاكره غير منظره وهو بيفطر وبيحط البرفان
تلاقى نفسها تلقائيا كرهاه ومش طايقاه وكانه السبب فى إللى حصلها طول اليوم
وجواها احساس دايم ومستمر انه مش حاسس بيها وبتعبها ومش بشيل معاها


هو طبعا مش حاسس بيكى بس مش لانه مبيحسش لانه مشافش ومعاشش إللى انتى شوفيه
بدل ماتطلعيه فيه طلعيه معاه وكونى حريصه انك ساعتها بتفضفضي مش بتلومى
هو مقصرش فى اى حاجه لأنه اصلا نزل قبلك وصحيح فطر وحط برفان بس هو راح هناك اتفرم وعمل شغل هو كمان هد حيله
احساسنا اننا مش متشافين والمعاناه إللى احنا فيها محدش حاسسها مؤلم جدا
علشان يحسها احكيها وانتى متاكده انك مش بتلوميه
اقفشي نفسك وانتى بتوجهيله أصابع الاتهام بالتقصير لمجرد أنه حط البرفان الصبح
كان برفان اسود ومهبب

#لايف_كوتش
#علا_عبيد

Share your own article to be the next published one: 747CG Article