Lamees Farran Feb 14, 2021

هو الحقيقه بعد ما كتبت اسم المقال حسيت انه عميق اوي عليَّ و إني ليه دخلت نفسي في جو الكتابات ده مش لعبتي و طول عمري مقتنعه اني مبعرفش اكتب بس الحقيقه اني قررت اكسر الحاجز ده و اطلع برة الكومفرت زون بتاعتي بعد رحلة طويلة مشيت فيها و لسا بكمل في رحلة الوعي بتاعتي

رحلة الوعي بالنسبه لي ببساطه هي اني بدل ما كنت بلوم عالاشخاص والظروف و الحياة و شايفه انه مفيش فايدة و بدل ما كنت بعافر في حجات ممكن تكون مش بتاعتي لمجرد وهم في دماغي او افتراض هو اصلا مش صح بقيت بالظبط زي اللي كان عنده استجماتيزم و شايف الدنيا مزغلله و لبس نضارة شاف بيها كل حاجه في مكانها بالظبط

بدأت رحلتي لما يإست و لما حسيت اني بلف في دايرة مغلقه دايماً ببدأ بحماس و ارجع تاني لنقطة الصفر و انا مش فاهمه ليه ولا ايه اللي بيحصل كنت لسا والده بنتي التانيه و حسيت اني متكتفه و مربوطه و كنت حسه اني لو سبت نفسي اكتر ممكن ادخل في اكتئاب و ساعتها ندهتلي النداهة بتقولي "يو نيد بروفيشنال هيلب" و ساعتها بدأت اول كوتشنج سيشن، كل الأسلاك الملغبطة جوه دماغي ابتدت تترتب واحده واحده و ابتديت افهم نفسي اكتر و افهم ليه بعمل كده و ازاي اوجه تفكيري من سلبي لإيجابي و فضلت لمدة شهرين و حقيقي اتعلمت فيهم كتير عن نفسي و عدت سنين و انا بركز اوي مع نفسي و تصرفاتي لحد ما حصلتلي مشكله كبيرة جدا في زواجي و كنت شايفه ان الحل الوحيد هو الطلاق و اني وصلت لحيطة سد

بس يشاء القدر اني ارجع تاني للكوتشنج و انا مش عارفه هروح علي فين و ارتب افكاري و دماغي و افهم نفسي اكتر و بقيت محملة نفسي مسئولية انك بقي عندك "وعي" لان فعلا بتحس ان كل اللي حواليك عايشين في سحابه سودا مش فاهمين نفسهم ولا مشاعرهم ولا مشاعر غيرهم لجأنا لrelationship coaching و بفضل الله رجعنا افضل من الاول بكتير لان ببساطه بقي عندنا احنا الاتنين "وعي"

وعي عن مشاعرنا و تصرفاتنا و احتياجتنا، وعي اننا مش ملك بعض احنا بنكمل بعض، وعي ان الموقف ليه دايما حكايتين و انه لكل واحد منظور مختلف و مشاعر و احساس غير التاني، وعي اننا مختلفين و عمرنا ما هنبقي زي بعض، وعي ازاي نتعامل في الخلافات. والحقيقه ان دي كانت افضل رحلة مشيت فيها هي "رحلة الوعي"

اللذيذ بقي ان رحلة الوعي دي مبتخلصش و كل ما تفتكر نفسك بقيت فاهم كل حاجه عن نفسك بتلاقي حجات تانيه كتير تكمل فهمك ده فهي رحلة طويلة و شيقة و ممتعه جداً و حقيقي مهمة لكل واحد انه يخوض فيها.

Share your own article to be the next published one: 747CG Article